Til hamingju (við) Norðmenn

Í dag er þjóðhátíðardagur okkar Norðmanna - 17. maí - sem eins og margir vita hefur eins og íslenski þjóðhátíðardagurinn skírskotun í dag sem tengist sjálfstæðisbaráttunni. Færri vita kannski eða muna að fyrir örfáum árum má segja að ríkisstjórn Íslands hafi verið að 1/6 norsk (sem líklega er grundvöllur Spaugstofu-paranojunnar um norska samsærið):

 

Geir H. Haarde fjármálaráðherra, nú forsætisráðherra, er hálfnorskur í föðurætt eins og margir vita, Siv Björg Juhlin Friðleifsdóttir, sem hefur verið umhverfis- og heilbrigðisráðherra (man ekki í svipinn hvað hún var þá) og er nú alþingiskona, er hálfnorsk í móðurætt, Tómas Ingi Olrich menntamálaráðherra, sem þá var, nú sendiherra, er hálfnorskur í föðurætt og Valgerður Sverrisdóttir, sem þá var iðnaðar- og viðskiptaráðherra og situr á Alþingi, er gift norskum manni - og stundum er jú talað um maka sem betri helminginn. Samkvæmt þessu voru 4 af 12 ráðherrum - 1/3 ríkisstjórnarinnar - "hálfnorskir" og íslenska ríkisstjórnin því að 1/6 norsk! Þetta fannst okkur Norðmönnum ágætt - en sjálfur taldi ég mig allt að því hálfnorskan fram eftir aldri af því að ég er fæddur í Noregi. Nú hef ég áttað mig á að svo er ekki en mér er alltaf hlýtt til Norðmanna eins og fram hefur komið.

 

Þennan dag 1814 var ein elsta stjórnarskrá Evrópu undirrituð á Eiðsvelli, fyrir norðan Osló (þá Kristjaníu). Til hamingju Norðmenn!

Er þér sama um fjölpóst, fríblöð og auglýsingabæklinga?

Áttu eftir að segja skoðun þína á auglýsingabæklingum og fríblöðum? Þú hefur tækifæri til morguns í óformlegri skoðanakönnun hér til vinstri. Sjá hér umræðu um mörkin þar á mili og önnur álitamál um þetta brýna málefni.

Mega auglýsingabæklingar vera innan í fríblöðum?

Nú birtist þriðja og væntanlega síðasta óformlega skoðanakönnunin um fjölpóst og fríblöð - hér til vinstri - og stendur hún í tvo sólarhringa. Í þeirri fyrstu varð niðurstaðan að 90% svarenda vildu, með almennum hætti, takmarka dreifingu fjölpósts til neytenda. Í annarri könnuninni kom fram að 81% vildi geta valið milli fjölpósts og fríblaða. Nú er spurt:

 

"Viltu geta afþakkað fjölpóst innan í fríblöðum?"

 

Taktu þátt og segðu þína skoðun.

Hve margir leggja fríblöð og fjölpóst að jöfnu? Sjáðu þessa óformlegu niðurstöðu

Jæja; þá er næsta skref að kynna niðurstöður úr annarri óformlegu skoðanakönnuninni hér um fjölpóst og fríblöð - en síðast varð niðurstaðan að 90% svarenda vildu, með almennum hætti, takmarka dreifingu fjölpósts til neytenda. Næst var spurt hvort neytendur vildu geta valið milli fjölpósts og fríblaða og afþakkað fríblöð sjálfstætt - eða hvort sama ætti að gilda um fríblöð og fjölpóst, allt eða ekkert? Skemmst er frá að segja að þó að sú skoðanakönnun hafi aðeins staðið í einn sólarhring varð svörun aðeins 33% minni en þó innan við 80 og því ekki marktækt tölfræðilega þannig að gera þarf alvöru könnun ef hagsmunaaðilar vilja byggja sameiginlega niðurstöðu beinlínis á slíkum könnunum. Niðurstaðan varð að aðeins 1 (%) var hlutlaus en 81% vildi geta valið milli fjölpósts og fríblaða. Um 18% lögðu fjölpóst og fríblöð að jöfnu og töldu því væntanlega ekki þörf á að í afþökkunarmiðum neytenda væri greint á milli fjölpósts (auglýsingabæklinga) og fríblaða (t.d. Fréttablaðsins, 24ra stunda eða Kópavogspóstsins).

 

Næstu skref verða kynnt síðar.

Hefurðu skoðun á fríblöðum og fjölpósti? Greiddu atkvæði!

Ef þú hefur skoðun á því hvort neytendur eigi að geta haft áhrif á hvort þeir fái fríblöð sjálfkrafa auk fjölpósts ættirðu að greiða atkvæði hér til vinstri. Ef þú hins vegar leggur fjölpóst (auglýsingabæklinga) og fríblöð að jöfnu vil ég auðvitað gjarnan líka heyra þitt sjónarmið. Athugasemdir eru vel þegnar ef spurningarnar endurspegla ekki veruleikann að þínu mati.

Ef þú fylgist ekki með barninu þínu, gerir það einhver annar

Foreldrar allra landa, sameinist; lítið á þetta - ef þið misstuð af frábæru Kastljósi nú í kvöld. Í stuttu máli er þetta auðvitað ekki bara neytendamál heldur almennt barnaverndarmál þar sem fram kemur m.a. að vefmyndavélar eiga ekki erindi til barna - einkum einmana barna, sem eru sjálfsagt mörg á Íslandi. Drengurinn fékk senda vefmyndavél í kynningarskyni! Hann var einmana og vantaði félaga - sem reyndust ekki vera táningar eins og hann heldur fullorðnir með aðrar hugmyndir en hann.

 

Ef við fylgjumst ekki með börnunum okkar fylgist einhver einhver annar með þeim - á netinu.

Allt eða ekkert; skoðanakönnun: Vilt þú geta afþakkað fríblöð sérstaklega?

Í óformlegri skoðanakönnun, sem lesa má um hér, var afdráttarlaus niðurstaða um hvort neytendur vildu takmarka almennt rétt atvinnurekenda til þess að dreifa óumbeðnum fjölpósti. Nú er spurt um fríblöð að auki - hér til vinstri. Spurningin er:

 

"hvort þú vilt geta valið á milli fjölpósts og fríblaða - og afþakkað fríblöð eða fjölpóst sjálfstætt?"

 

- eða -

 

"á "nei takk" (eða "já takk," sbr. hér) að gilda um bæði fjölpóst og fríblöð?"

 

Ef svo er myndi sá, sem afþakkar óumbeðnar sendingar á annað borð, hvorki fá fjölpóst né fríblöð - allt eða ekkert!

Það er gott að synda í Kópavogi

Á fjórföldum hátíðisdegi í gær - hvítasunnu, mæðradegi, sigurdegi Manchester United og afmælisdegi Kópavogs - var lýst opin endurbætt "gamla" Kópavogslaugin. Við börnin nutum þess í dag á fyrsta opnunardegi hennar að fara í þessa frábæru laug með góðar aðstæður og fjölskylduvæna hönnun; sem dæmi má nefna eru heitari pottar áfastir barnapottum þannig að við foreldrar getum látið þreytu og streitu líða úr kroppnum um leið og við fylgjumst með börnunum okkar í skemmtilegum barnapotti alveg við. Ég hirði ekki um að nefna smávægilega annmarka hér sem eflaust verður bætt úr enda slær laugin nú flestum fjölskyldulaugum við - en höfum við þó farið víða í laugar.

Rúm 90% svarenda vilja takmarka dreifingu fjölpósts til neytenda

Rétt rúmlega 90% svarenda í óformlegri skoðanakönnun hér á neytendablogginu vilja takmarka dreifingu óumbeðins fjölpósts til neytenda. Í þessu felst mikilvæg leiðbeining fyrir mig sem talsmann neytenda - sem hef unnið að slíkri takmörkun - því að mínu mati er þetta óvenju afdráttarlaus niðurstaða sem hlýtur því að gefa vísbendingu um vilja neytenda þó að auðvitað sé könnunin ekki eftir kúnstarinnar reglum, aðferðarfræðilega, þar sem ekki er um tilviljunarúrtak að ræða. Niðurstaðan er hins vegar mun afdráttarlausari en ég átti von á þrátt fyrir umfjöllun undanfarið sem má m.a. lesa hér, hér og hér á bloggsíðu minni og á vefsíðu talsmanns neytenda.

 

Spurt var:

 

"Á að takmarka rétt atvinnurekenda til þess að dreifa óumbeðnum fjölpósti í póstkassa/-lúgur neytenda með almennum reglum?"

 

Þá er athyglisvert að mikill meirihluti þeirra (60%) sem svara játandi vilja ganga lengra en lagt hefur verið til í starfsnefnd á vegum Póst- og fjarskiptastofnunar, þar sem ég átti sæti, en lesa má um strand þess starfs hér. Þessi stóri meirihluti svarenda, sem vill takmarkanir, vill að aðeins þeir sem segi sérstaklega "já takk" við fjölpósti fái hann - sem gengur mun lengra en ég hef lagt til í því skyni að tryggja rétt neytenda; slík leið þarf hins vegar að mínu mati að styðjast við traustari (laga)heimildir en sú leið sem ég reynt að tryggja og virkja, þ.e.a.s. að neytendur geti á einfaldan og samræmdan hátt sagt "nei takk" við fjölpósti og eru 40% þeirra neytenda, sem vilja almennar takmarkanir, sáttir við þá nálgun.

 

Af um 120 þeirra sem greiddu atkvæði var enginn hlutlaus eða vildi ekki svara; það segir sína sögu! Því voru rétt innan við 10% svarenda þeirrar skoðunar að ekki þyrfti að takmarka með almennum reglum rétt atvinnurekenda til þess að dreifa óumbeðnum fjölpósti í póstkassa eða -lúgur neytenda. Þeir skiptust milli svarkostanna að ástandið væri fínt eins og það væri (6%) og að neytendur gætu passað sig sjálfir (3,4%).

 

Önnur athyglisverð niðurstaða er reyndar að aðeins tæplega 15% þeirra nærri 800 gesta sem litu inn á bloggsíðu mína þessa rúma þrjá sólarhringa sem hin óformlega skoðanakönnun stóð yfir (fyrir mistök í stað 2ja) greiddu atkvæði. Auk hugsanlegs áhugaleysis á málefninu kann þessi lága "kjörsókn" að helgast af tvennu. Annars vegar eru e.t.v. margir sem eru fastagestir á síðunni og geta aðeins greitt atkvæði einu sinni í hverri könnun þó að þeir teljist sem gestir einu sinni á hverjum sólarhring (og myndi þá hlutfallið hækka í allt að 1/3-2/3 eftir því hvaða sólarhring er miðað við). Hins vegar voru færslur eftir upphafsfærsluna ekki tengdar fjölpósti nema neðanmáls. Þessi óvissa um "kjörsókn" gæti falið í sér að skynsamlegt væri að óformlegar skoðanakannanir stæðu aðeins í sólarhring og þá helst á virkum dögum þegar fréttalestur er heldur meiri (eða mjög lengi, ótímabundið, eins og sumir gera).

 

Eins og áður hefur vakin athygli á hér og við bloggdeild mbl.is er því miður ekki hægt að sýna niðurstöður skoðanakönnunar á blogginu eftir að tímabundinni könnun lýkur. Leiðbeiningin sem felst í slíkri óformlegri könnun sem þessari veitir hins vegar líkur á því að áframhald verði á hér á neytendablogginu.

"Til hamingju með daginn"

"Til hamingju með daginn,"

 

sagði maðurinn þegar ég kom í heita pottinn rétt upp úr kl. fjögur í dag. Ég hikaði; ég hélt ekki að ég væri svo kvenlegur í útliti - auk þess sem við þekkjumst ágætlega. Við þekkjumst þó greinilega ekki nógu vel - því ég sagði bara,

 

"takk sömuleiðis"

 

 - í trausti þess að við værum sammála um að samgleðjast yfir mæðradeginum - enda var ég nýbúinn að láta börnin kaupa rósir handa móður sinni.

 

"Ég treysti því að þú sért United-maður,"

 

sagði hann þá, er hann sá hikið á mér.

 

***

Nú eru síðustu forvöð að taka afstöðu til þess hvort eitthvað - og hvað - skuli gert fyrir neytendur gagnvart fjölpósti í óformlegri skoðanakönnun hér til vinstri.

Manchester United er enskur meistari 2008