Útrétt sáttahönd þreytist

Nú hafa fulltrúar lántakenda beðið í heila viku eftir svari frá félags- og tryggingamálaráðherra um hvort þeir fái aðild að endurskipulagningu skulda heimilanna. Stjórnvöld hafa fundað með fulltrúum kröfuhafa, þ.m.t. ASÍ - sem stendur að lífeyrissjóðum sem eru meðal kröfuhafa. Því verður ekki trúað að stjórnvöld afþakki gott boð um samstarf við neðangreinda aðila - eftir nær árs bið eftir að tekið verði í eitt skipti og með heildstæðum hætti á skuldum neytenda í kjölfar forsendubrests við gengisfall um páskana í fyrra og gengishrun í kjölfar bankakreppu.

 

Lengur verður vart beðið eftir að tekið verði í sáttahönd eftirfarandi aðila sem starfað hafa saman frá sameiginlegu ákalli 11. febrúar sl., þ.e.

• Búseta á Norðurlandi,
• Félags fasteignasala,
• Hagsmunasamtaka heimilanna,
• Húseigendafélagsins og
• talsmanns neytenda.

 

Sjö mánuðum síðar endurnýjuðu sömu aðilar ákallið ásamt fleirum og í kjölfarið var fundað með ráðherra og þingflokkum stjórnarflokkanna auk ASÍ, Neytendasamtakanna og þingflokks Framsóknarflokksins og boðið upp á viðræður um leiðir til niðurfærslu. Á fundinum með ráðherra var óskað eftir fullri og beinni aðild að því að móta aðgerðir. Ráðherra veit að beðið er eftir svari.

 

Ræða um greiðsluvanda heimila

Athugasemdir

[Marinó G. Njálsson, 23.9.2009 kl. 23:49]

Já, þetta er furðuleg uppákoma hjá stjórnvöldum.  Skilja þau ekki að staða ASÍ er sem kröfuhafi ekki fulltrúi lánþega.  En meðan við vitum ekki hvað á að bjóða, þá hef ég tekið þá afstöðu að hvorki lofa né lasta það sem verður hugsanlega boðið.  Dag skal að kvöldi lofa og mey að morgni.