Afmælisstjórnin

Það fer vel á því að ný ríkisstjórn Samfylkingar og Vinstrihreyfingarinnar - Græns framboðs - taki við á morgun 1. febrúar - ekki bara vegna 33ja ára afmælis Katrínar Jakobsdóttur, verðandi menntamálaráðherra, heldur á sjálf heimastjórnin 105 ára afmæli á morgun, 1. febrúar. Þann dag árið 1904 tók Hannes Hafstein fyrstur Íslendinga við embætti ráðherra Íslands og með því færðist æðsta handhöfn framkvæmdarvalds frá Kaupmannahöfn til Reykjavíkur - sem hafði verið áralangt baráttumál og deiluefni í íslenskum stjórnmálum. Á sama tíma hófst sú óslitna stjórnskipunarvenja - sem síðan er stjórnarskrárvarin - að skipun ráðherra (frá 1917 ríkisstjórnar) þurfi að styðjast við meirihluta Alþingis eða njóta a.m.k. hlutleysis meirilhluta alþngismanna. Sú regla er kennd við þingræði. Fyrir réttum 15 árum, á 90 ára afmæli heimastjórnar og þingræðis, hélt Orator, félag laganema (við lagadeild Háskóla Íslands), upp á tímamótin með göngu niður að Stjórnarráðshúsi. Svo vel vildi til að afmælið bar upp á þriðjudag, að mig minnir, reglulegan fundardag ríkisstjórnar. Af því tilefni hélt ég sem ritstjóri Úlfljóts, tímarits laganema, ræðu f.h. Orators fyrir þáverandi ríkisstjórn, fyrsta ráðuneyti Davíðs Oddssonar, sem kölluð var út á Stjórnarráðströppurnar í tilefni dagsins. Kannski ég birti ræðuna hér á morgun til að fagna þessum tímamótum. Ég óska fyrsta ráðuneyti Jóhönnu Sigurðardóttur alls velfarnaðar í mikilvægum störfum sínum á næstu mánuðum.

Stjórnin mynduð á morgun

Athugasemdir

[Hólmfríður Bjarnadóttir, 31.1.2009 kl. 15:18]

Þarna hafa forlögin gripið inn í munu sumir segja og þessi dagur gerir stjórnarmyndun Jóhönnu enn meiri tímamót fyrir íslenskt samfélag. Góð ábending og nú er bara að vita hvort Sigmundur Davíð er svo djúpvitur að hafa gert töf Framsóknar á þessum forsendum að hluta. Tel að Sigmundur Davíð sé ágætlega skynsamur maður fyrir utan flokksvalið sitt.