"Sérstaklega ekki maskara!"

Þú ert besti pabbi í heimi,

 

fæ ég stundum að heyra frá börnunum mínum - þegar ég samþykki eða ákveð að gefa þeim einhver sætindi án þess að nammidagur sé eða önnur lögvarin krafa á slíku. Þetta varð mér nú tilefni til þess að segja að maður væri ekki endilega gott foreldri fyrir þær sakir að leyfa börnunum allt sem þau vildu eða gefa þeim eitthvað óhollt og svoleiðis. Ég ætlaði að bæta við því sjálfsagða (að þvert á móti setji góðir foreldrar takmörk, reglur, leiðbeiningar og jafnvel boð og bönn) þegar eldri dóttir mín greip frammí - með ákefð.

 

Sérstaklega ekki maskara!

 

Ég gat ekki annað en hlegið (óvart) - og tekið undir með henni - sem hefur fengið þau, væntanlega nokkuð samræmdu, skilaboð frá okkur foreldrunum að snyrtivörur séu ekki almennt ætlaðar fyrir litlar stelpur. En hún bíður spennt þangað til hún verður 16 ára því þá hættir hún að stækka og getur, að sögn, sett maskara á augnhárin sem þá verða líka hætt að stækka og þá verður samræmi í öllu saman.

 

Ég varð að spyrja hana - svipað og maðurinn í áramótaskaupinu (sem varð að blogg'um'etta):

 

Má ég blogga um þetta?

 

Ég fékk leyfi til þess.

Athugasemdir

[Guðbjörg Erlingsdóttir (IP-tala skráð) 20.7.2008 kl. 10:25]

Svo sammála, maskarar ættu að koma með svona bannað innan 16 ára aðvörun!